Utdanningsdirektoratet arbeider for at barn, unge og vaksne skal lære, meistre og trivast i eit inkluderande læringsmiljø. Vi skal bidra til at barn, unge og vaksne blir kvalifiserte og førebudde på deltaking i arbeids- og samfunnsliv.

På grunn av permisjonar og komande pensjoneringar har vi fire ledige stillingar som fagansvarleg for eksamen i yrkesfag (tre faste og eitt engasjement). I denne rolla vil du få eit særskilt ansvar for sentralt gitt eksamen innan eitt eller fleire yrkesfaglege utdanningsprogram. Dette inneber mellom anna å følgje opp eksterne eksamensnemnder som lagar eksamensoppgåvene, og sørgje for kvalitetssikring av desse i vårt digitale system. Arbeidet med eksamen skjer i team og krev høg grad av samarbeid, evne til å planleggje arbeidet godt og levere i tide på felles fristar gjennom eit detaljert årshjul. Det er derfor ein føresetnad at du samarbeider godt med andre og likar å jobbe i IT-systema våre.

Vi ser etter deg som er god på planlegging, igangsetjing og ferdigstilling av arbeid, og som er merksam på når involvering av andre er nødvendig. Arbeidet med eksamen krev at du er nøyaktig og flink til å sikre at alle detaljar er rette. Ved sidan av arbeidet med å lage eksamen etter dagens ordning, vil du òg bidra i arbeidet med å vidareutvikle eksamen. Det er òg venta at du bidreg til å utvikle innhald i eksisterande og nye læreplanar, slik at kompetansen som er beskriven til ei kvar tid samsvarar med arbeidslivet sine behov.

Vi tilbyr eit inspirerande arbeidsmiljø prega av fagleg dyktigheit, godt samarbeid og ein felles visjon om å forbetre utdanningssystemet. I denne stillinga vil du, gjennom arbeidet med utvikling av sentralt gitt eksamen i yrkesfag, i tråd med nye læreplanar og i eit digitalt gjennomføringssystem, bidra til eit viktig samfunnsoppdrag.

Du vil høyre til avdeling for eksamen yrkesfag, men òg bidra på tvers i divisjonen i team med høgt kvalifiserte og motiverte medarbeidarar. Divisjon for læring og vurdering består av om lag 100 medarbeidarar fordelte på 7 avdelingar og eit senter. Vi har ansvar for utvikling og forvaltning av rammeplan, læreplanar, prøver og eksamenar i grunnopplæringa, i tillegg til IT-systema som blir brukte til desse. Vi er opptekne av samanhengen mellom fagområda våre, slik at elevar, skolar og skuleeigarar kan jobbe heilskapleg med utvikling av opplæringa.

Kvalifikasjoner:

Du må ha

• relevant utdanning, minimum bachelorgrad (relevant erfaring kan i nokre tilfelle kompensere for utdanningskravet)
• relevant erfaring frå undervisning og arbeid med eksamen, fortrinnsvis frå yrkesfaga
• god system- og rolleforståing
• god skriftleg og munnleg formuleringsevne på norsk
• god IT-kompetanse

I tillegg er det ein fordel om du har

• kunnskap om læreplanar og vurderingsordningar innan dei yrkesfaglege utdanningsprogramma
• erfaring med å leie arbeidsgrupper og utviklingsarbeid
• kjennskap til å arbeide på ulike digitale plattformer
• erfaring med innhaldsproduksjon i digitale system
• erfaring frå utgreiings- og forvaltningsarbeid

Vi ber om at vitnemål, karakterutskrifter og attestar blir lagde ved den elektroniske søknaden innan søknadsfristen.

Personlige egenskaper:

• du bidreg aktivt til godt samarbeid på tvers og involverer relevante aktørar
• du har evne til å strukturere, drive og følgje opp prosessar frå start til slutt
• du arbeider sjølvstendig, tek initiativ og har ansvar for eigne leveransar
• du jobbar målretta og søkjer kontinuerleg forbetringar i arbeidsprosessar og tenester
• du planlegg godt, prioriterer rett og leverer innan avtalte tidsfristar
• du har høg kvalitet i arbeidet og er oppteken av presisjon og detaljar
• du formidlar tydeleg og tilpassar bodskapen etter mottakar og kanal
  

For oss er det viktig korleis du som person eignar deg for jobben. Dette vil bli vurdert samla.

Vi tilbyr:

• løn som rådgivar/seniorrådgivar (kode 1434/1364), p.t. kr 625 000–900 000 per år (for særskilt kvalifiserte søkjarar kan noko høgare løn vurderast)
• medlemskap i Statens pensjonskasse
• fleksibel arbeidstidsordning
• trening i arbeidstida
• nyoppussa lokale i Oslo sentrum, gratis innandørs sykkelparkering, svært god kantine og kaffibar
• utstrakt bruk av team- og prosjektorganisering
• gode faglege utviklingsmoglegheiter
• eit stimulerande og godt arbeidsmiljø med høg fagleg kompetanse

Utdanningsdirektoratet skal vere prega av mangfald, og vi oppmodar alle som er kvalifiserte til å søkje jobb hos oss uavhengig av alder, funksjonsevne, kjønn, seksuell orientering, religion eller etnisk bakgrunn. Vi oppmodar deg til å krysse av i søknaden dersom du har funksjonsnedsetjing, hol i CV-en eller innvandrarbakgrunn. Vi kallar inn minst éin kvalifisert søkjar til intervju i kvar gruppe. Du kan lese meir om krava for å bli vurdert som søkjar i desse gruppene her. Vi legg vekt på å tilretteleggje arbeidsforholda dersom du har behov for det.

Dersom du ønskjer å reservere deg frå oppføring på offentleg søkjarliste, må dette opplysast om og grunngjevast i Webcruiter under «Hensyn». Opplysningar kan bli offentleggjorde sjølv om du har bede om ikkje å bli ført opp på søkjarlista. Du blir varsla dersom ønsket om reservasjon ikkje blir teke til følgje.