Bergen Offentlege Bibliotek jobbar smart og bruker mange digitale system og verktøy for å gje gode tenester til innbyggarane, og for å legge til rette for best mogeleg intern samhandling. Me søker no etter ein dyktig, engasjert og allsidig IKT-systemkoordinator som vil drive fram og koordinere aktivitetar knytt til systema våre, samt bidra til arbeidet vårt med data og læring. Stillinga vil ligge til avdeling for Teknologi og læring.

Det viktigaste systemet i verksemda er fagsystemet Bibliofil som heldt orden på alle lånarar, bøker og utlån, men me har også sjølvbetjeningsløysingar, system for utstillingar og opplevingar, digitale utlånssystem for e-bøker, film og spill, vaktplansystem og ulike samhandlingsløysningar. Til stillinga ligg det også å jobbe med publikum, og å bidra til å skape en arena for læring og opplysning i ei digital tid, til dømes gjennom tilrettelegging av kodeklubbar, styrke informasjonskompetanse eller ved å stimulere til digital lesedugleik.

Biblioteket er i vekst, og for å kunne gje trygge innbyggertenester, ta kunnskapsbaserte avgjerder og ha kompetente medarbeidarar, er me spesielt opptatt av informasjonstryggleik og personvern, data og statistikk, samt å bygge eit godt miljø for læring. Håpar du har lyst til å bli med på laget!