Vestnes kommune har ledig nyoppretta stilling som kommunalsjef for samfunnsutvikling og samskaping. Kommunalsjefen har ansvar for heilskapleg og samfunnsmessig utvikling av Vestnes kommune med fokus på samskaping internt og saman med eksterne aktørar, som til dømes næringslivet. 

Organisert under kommunalsjefen, er til dømes: Planarbeid, beredskap, næringsutvikling, oppmåling, innkjøp, kommunale bygg og vegar, vatn og avløp, byggesak, klimasatsing, berekraftsarbeid med meir. 

Vi søker ein framoverlent, tillitsvekkande, samordnande og strategisk kommunalsjef som har god kompetanse og forståing for kommuneøkonomi, plan- og utviklingsarbeid, gode kommunikasjonsevner og har ein motiverande og samlande leiarstil.

I godt samspel med politikarar, leiarar og tillitsvalde skal kommunalsjefen arbeide både for vidareutvikling av kommunen, og for gode effektive og berekraftige tenester til innbyggarane våre.

Vår nye kommunalsjef samfunnsutvikling og samskaping må ha evne til å tenke kommunen heilskapleg, må ha god forståing for samspelet mellom politikk, administrasjon og fag. Kunnskap om samfunns- og næringsutvikling, kompetanse frå endringsleiing og kulturbygging, kunnskap om digital utvikling, god munnleg og skriftleg framstillingsevne, erfaring frå organisasjonsutvikling, omstilling og prosjektleiing vil vere sentralt.

Vi ønsker søkarar med høgare utdanning (minimum bachelorutdanning og gjerne med relevant vidareutdanning) innan relevante fagområde som kan vise til god leiarerfaring med dokumenterte gode leiareigenskapar. Kunnskap om forvaltingsarbeid er ønskeleg. Erfaring frå offentleg sektor vil bli vektlagt, men anna leiarerfaring i kombinasjon med kunnskap om kommunale samfunnsmessige utfordringar kan og vere eigna bakgrunn. Personleg egnethet blir vekta ved tilsetting.

Vi ønsker handlekraft og engasjement i form av gjennomføring av politiske vedtak, aktiv deltaking i kommunedirektøren si toppleiargruppe, gjennom å skape nye innovative løysingar og relasjonsbygging og samskaping på tvers av fag. 

Vi tilbyr spanande og utfordrande oppgåver i ein kommune med dyktige medarbeidarar og godt samspel mellom politikk og administrasjon. Løn og øvrige vilkår etter nærare avtale. Vestnes kommune har eigen leiaravtale. 

Tilsettingsvilkår
Løn etter avtale. Det vert trekt 2% av løna i pensjonsinnskot. Prøvetida er 6 månader i faste stillingar.

Aktuelle søkarar blir innkalla til intervju.

Referansar
Oppgi referansar.

Søknad
Vestnes kommune nyttar elektronisk søknadsprosess.  Attestar og vitnemål må derfor takast med til intervju.

Søkarlista kan bli offentleggjort.