Region- og mottaksavdelinga (RMA) har drift av statlege mottak for asylsøkjarar som hovudoppgåve. Det inneber å etablere mottak gjennom avtalar med driftsoperatørar, å dimensjonere mottaksplassar etter behov, å utvikle kvalitet og standard for mottaksarbeidet, å differensiere mottakstilbodet for ulike bebuargrupper og å sikre ei god økonomiforvaltning på mottaksfeltet. I mottakssystemet bur det for tida om lag 1750 personar fordelte på i underkant av 20 asylmottak over heile landet. Avdelinga har også ansvaret for assistert retur og for busetjingsførebuande arbeid.   
 
Avdelinga har 140 medarbeidarar fordelte på einingar i Oslo og dei fem regionkontora i Kristiansand, Bergen, Trondheim, Narvik og på Gjøvik.  
 
Vi søkjer no etter éin eller to dyktige rådgivarar/seniorrådgivarar til Regionkontor Vest i Bergen. Kontoret har i dag ti medarbeidarar og dekkjer fylka Rogaland og Vestland.  
 
Regionkontoret skal bidra til å utvikle kvalitet og standard for mottaksarbeidet og sikre ei god økonomiforvaltning på mottaksfeltet.  
 
Regionkontor Vest har i tillegg nasjonalt ansvar for å koordinere arbeidet med ulike typar butilbod for personar som har helse- eller omsorgsbehov ut over det ordinære mottak kan handtere. Regionkontoret har også eit nasjonalt fagleg og koordinerande ansvar for ekstraordinære driftstilskot til mottaka og for det busetjingsførebuande og integreringsfremjande arbeidet mottaka gjer. Vi søkjer no etter éin eller to medarbeidar som kan bidra til å styrkje oss i arbeidet på desse områda. Den som blir tilsett, skal i tillegg til å samarbeide med dei tilsette ved kontoret også samarbeide tett med tilsette frå dei andre regionkontora og einingane i Region- og mottaksavdelinga og andre avdelingar på tvers i UDI.