Kystverket utviklar transportsystem til sjøs som er sikre, fremjar verdiskaping og bidreg til omstilling til lavutsleppssamfunnet. Det er sett ambisiøse mål innan framkome, transportsikkerheit og klima/miljø. Konkurranseevna til sjøtransporten, utnytting av ny teknologi, samt organisasjonsutvikling, er viktige utfordringar for å kunne møte morgondagens krav. Kystverket har brei samhandlingsflate innan samferdsle, mot andre samfunnsaktørar, og har internasjonalt samarbeid både med nasjonar og organisasjonar for å standardisere, effektivisere og trygge sjøfarten.

Frå 01.01.2021 er Kystverket funksjonsorganisert med fire ulike verksemdsområder, der eit av desse er miljøberedskap. Kystverket er tillagt statlege oppgåver i samband med akutt forureining i forureiningslova og svalbardmiljølova. Verksemdsområdet for miljøberedskap utøver myndigheit innan akutt forureining, har operativt ansvar for statens beredskap mot akutt forureining, har ansvar for å samordne statleg, privat og kommunal beredskap og ansvar for forvaltningsoppgåver relatert til fagområdet. Verksemdsområdet er i tillegg til stab delt inn i tre avdelingar; logistikk og teknologi, miljø og analyse, samt operasjon- og samordning. Avdelingane har hovudsete i Horten, og dei fleste tilsette har kontorstad der. Verksemdsområdet har også eit kontor i Tromsø, lokalisert på Framsenteret, som har nokre tilsette tilhøyrande kvar av dei tre avdelingane. Tromsø-kontoret har ei særskild oppgåve retta mot beredskap i nordområda, frå Nordland fylke og nordover, inklusive Svalbard. 

Vi søker no etter ein seniorrådgivar til operasjons- og samordningsavdelinga. Stillinga er plassert i Tromsø.

Nokre av operasjon- og samordningsavdelinga sine oppgåver er:

• Samordning av privat, kommunal og statleg beredskap mot akutt forureining
• Forvalte og følge opp Kystverkets beredskapsplan mot akutt forureining
• Koordinere, planlegge og gjennomføre trening, kurs og øvingar innan fagområdet
• Operativ leiing og koordinering av statlege aksjonar mot akutt forureining 
• Oppfølging av beredskapsavtalar
• Prosjekt- og utgreiingsarbeid
  

Kvalifikasjoner:

Det er krav om:

• Relevant høgare utdanning frå universitet eller høgskule, fortrinnsvis innan maritime fag eller beredskapsleiing. Relevant erfaring kan kompensere for manglande formalkompetanse. 
• Å vere trygg og trivast i ein operativ, utadretta rolle
• God munnleg og skriftleg framstillingsevne i norsk og engelsk
• Førarkort klasse B
  

Det vil bli lagt vekt på følgjande kvalifikasjonar:

• Erfaring frå gjennomføring av kompetansebyggande aktiviteter (trening, kurs, øvingar) innanfor offentleg eller privat verksemd
• Relevant erfaring frå operativt beredskapsarbeid
• Operativ erfaring med oljevernaksjonar
• Erfaring frå prosjektarbeid/prosjektleiing
• Erfaring med utgreiings-/analysearbeid

Personlige egenskaper:

• Systematisk
• Høg arbeidskapasitet
• Lagspelar som òg trivst med sjølvstendige oppgåver
• Analytiske evner
• Fleksibel, omgjengeleg og samlande
• Trygg i ei representasjonsrolle

Vi legg til grunn at du er framtidsretta, engasjert og påliteleg - som er Kystverket sine verdiar.

Vi tilbyr:

• Spanande og varierte arbeidsoppgåver innafor eit samfunnsnyttig og profilert arbeidsområde
• Eit godt arbeidsmiljø
• Kompetente og dyktige kollegaer
• Ei utfordrande stilling med utviklingsmogligheiter
• God pensjonsordning i Statens pensjonskasse
• Fleksibel arbeidstid
• Ferieheimsordning ved nokre av fyra til Kystverket
• Stillinga blir plassert i kode 1434 rådgivar eller 1364 seniorrådgivar, ltr 62-73, frå brutto kr 555.800 til brutto kr 682.000, avhengig av kvalifikasjonar
• Den som vert tilsett må pårekne å inngå i Kystverkets beredskapsvaktordning
  

Arbeidsstad er for tida Tromsø.

Kystverket skal vere prega av mangfald og våre tilsette skal spegle befolkninga. Vi oppmodar alle som er kvalifiserte til å søke stillinga.
I samsvar med offentleglova § 25 gjer vi merksam på at opplysningar om søkaren kan bli offentleggjort, sjølv om søkaren har bede om ikkje å bli ført opp på søkarlista. Søkarar vil i så fall bli varsla om det.