Vil du arbeida med branntryggleik i Kvam herad?

Kvam brann- og redningsvesen søkjer etter branninspektør til å utføra brannførebyggjande arbeid i heradet. Stillinga er nyoppretta. Om du trivast med å vera i kontakt med andre menneske, og ser verdien av å førebyggja brannar, er du kanskje den me søkjer etter.

Kvam brann- og redningsvesen er organisert med 2 avdelingar; avdeling for førebyggjande arbeid og avdeling for beredskap. Stillinga vil vera knytt til avdeling for førebyggjande arbeid.

For meir informasjon om korleis Kvam brann- og redningsvesen er organisert, sjå informasjon på nettstaden til Kvam herad.

Arbeidsoppgåver

I samsvar med brannvesenets oppgåver som er beskrive i brann- og eksplosjonsvernlova § 11 skal du arbeida aktivt med brannførebyggjande arbeid i heradet.

Arbeidsoppgåver vil mellom anna vera å:

• Utføra informasjonsarbeid gjennom føredrag, samtalar, møter, kurs og sosiale medier
• Utføra brannførebyggjande arbeid i skule og barnehage, overfor risikoutsatte grupper med meir
• Planleggja, gjennomføra og fylgja opp branntilsyn for objekt med særskild risiko
• Fylgja opp bekymringsmeldingar
• Utføra informasjons- og opplæringstiltak for verksemder
• Utføra offentleg sakshandsaming etter brann- og eksplosjonsvernlova
• Utføra andre oppgåver som vil liggja naturleg til stillinga

Kvalifikasjonar

Brann- og redningsvesenforskrifta § 40 stiller krav til førebyggjande personell i brann- og redningsvesenet.

Kvalifikasjonskrav:

• Universitets- eller høgskuleutdanning på bachelornivå, eller
• Yrkesutdanning som brannkonstabel heiltid eller deltid, og kurs for utrykkingsleiar deltid eller heiltid, jf. brann- og redningsvesenforskrifta § 41, eller
• Fagutdanning i samsvar med læreplan fastsatt for personell som skal utføra feiing og tilsyn med fyringsanlegg, jf. brann- og redningsvesen forskrifta § 38, eller
• Anna relevant fagskule- eller fagutdanning

Førebyggjande personell med oppgåver innan brannførebyggjing skal også ha gjennomført yrkesutdanning i samsvar med kursplan for førebyggjande brannvern innan 2 år frå tilsetjing (per 2023 er det totalt 6 veker med kurs på brann- og redningsskulen).

Det vert også stilt krav om at du har:

• Førarkort klasse B.
• Fysisk i stand til å kunne gjennomføra branntilsyn
• Har gode IT-kunnskapar
• Har gode framstillingsevner, både skriftleg og muntleg, og kan nytta nynorsk som skriftmål
• Kan framvisa gyldig politiattest før tilsetjing

Personlege eigenskapar

Stillinga med tilhøyrande arbeidsoppgåver vil innebera utstrekt samarbeid og kontakt med mange forskjellige aktørar.

Me legg vekt på at du har desse eigenskapane:

• Er sjølvstendig og strukturert
• Er fleksibel og omstillingsdyktig
• Har ei analytisk tilnærming til ulike problemstillingar
• Er omgjengeleg, utadvendt og positiv
• Er motivert og har gode evner til å samarbeida med andre
• Er samfunnsengasjert og bevisst rolla som myndigheitsperson
• Er resultatorientert
• Er initiativrik

Me tilbyr

• Ein trygg og sikker jobb i ei verksemd i utvikling
• Eit godt arbeidsmiljø, stor grad av feksibilitet og sjølvstendigheit
• Moglegheiter for vidareutvikling gjennom kurs, utdanning og faglege samlingar på tvers av kommunane i samarbeidsavtalen med Vest brann- og redningsregion, samt nasjonale fagsamlingar.
• Nødvendig opplæring til å utføra arbeidet i samsvar med lover og forskrifter
• Fleksitid
• Lønn etter avtale, med gode pensjons- og forsikringsvilkår
• Me jobbar etter målsetjingar, og har tillit til at alle gjer sitt for at me når måla. For den rette kandidaten styrer du i stor grad sjølv din eigen arbeidskvardag.

Ved kontakt med eksterne aktørar er stillinga underlagt uniformsplikt etter eige uniformsreglement.

Dersom du ynskjer det sjølv kan me tilby å vera ein del av beredskapen i heradet ved å bistå beredskapsavdelinga ved behov. Det kan vera å utføra arbeidsoppgåver under innsats, anten på operativt eller administrativt nivå. Om du skal ta del i beredskapsarbeid, som for denne stillinga er frivillig, krev det fysisk test og helsesjekk.

Generell informasjon:

Den kommunale organisasjonen skal i størst mogleg grad spegla mangfaldet i befolkinga. Målet er difor å oppnå ei balansert samansetjing når det gjeld alder, kjønn og kulturell bakgrunn.

I Kvam herad er det offisielle styringsmålet nynorsk. Me gjer merksam på at etter offentleglova § 25 kan opplysningar om søkjaren bli offentlege sjølv om søkjaren har oppmoda om ikkje å bli ført opp på søkjarlista. Dersom oppmodinga ikkje vert teke til følgje, vert søkjaren varsla om dette.